அகம் மறைத்த புறம்

கோபத்தோடும் பயத்தோடும்

யாருக்கும் தெரியாத

பாதி மண் மூடிய கிணற்றுக்குள்

காமம் கொல்லாத சாமியார்

மக்கள் நலன் பாரா மன்னன்

மோகம் கிளறும் நடிகை

கொள்ளைக்கார மந்திரி

நாய் நக்கும் குடிகாரன்

விலை போகும் தலைவன்

மிரட்டும் போக்கிரி

கெட்டுப்போன தண்ணீர்

நாற்றமடிக்கும் காற்று

மண்ணைத் தின்ற இராசயனம்

நியாயம் இல்லா தொலைக்காட்சி

லஞ்சம் வாங்கும் காவல்துறை

எல்லோரையும் சாடி

வெண் காகிதத்தில்

கருப்பு மையில்

கடிதம் எழுதுகிறேன்

இப்படிக்கு என

என் பெயர் இட துளியும்

துணிவின்றி

தனித்தனியே உறையிலிட்டு

முகவரி சரி பார்த்து

வில்லை ஒட்டி அனுப்பி

நெஞ்சு நிமிர்த்தி வீடு செல்கிறேன்

விழித்துப்பார்க்கிறேன்

எல்லாத் தபாலும்

இறைந்து கிடக்கிறது

என் வீட்டு முற்றத்தில்

எழுதும் போது உணராத

என் பேனா மையின் புளித்த நாற்றம்....

இப்போது நாசி நிரடுகிறது...

என் மன நாற்றத்தோடு சேர்ந்து