ஒரு ஏழு மணி எழவு

செல்லாத்தா செழிப்பா வாழ்ந்தது பட்டிக்காடு

புருசனுக்கு பிறகு பட்டணத்துல பையனோட

நாலாவது மாடியில பளபளன்னு தங்க(க்) கூடு

எல்லாம் வீட்டுக்கே வந்துடும் மனுசமக்கா தவிர

வேலைக்கு ஆளு, வெளுக்கறதுக்கு மெசினு

போகவரக் கார், பெரிய கலர் டிவி, ஏசி மெசின்

படுக்க பஞ்சு மெத்தை, பக்கத்திலயே கக்கூஸ்

காசு இருந்தா என்ன குறை பட்டணத்துல

நெஞ்சுல சுருக்குங்குதேன்னு கூப்பிட

பரிட்சை புத்தகத்தோட ஓடிவந்த பேத்தியும்

பதறியடிச்சு ஓடிவந்த மருமகளும்

தந்த தண்ணியில ரெண்டு வாய் எறங்கல

மேல் வீட்டு கம்பவுண்டர கூப்பிட்டுப் பார்க்க

பேச்சும் இல்ல பேசறதுக்கு மூச்சும் இல்ல

எந்தச் சிரமும் வைக்காம ஏழுமணிக்கு

செத்துப் போச்சு செல்லாத்த கெழவி

கடிகாரத்தப் பார்த்து நேரத்த குறிச்சிட்டு

பாயை விரிச்சு பாட்டி உடம்ப படுக்கைல போட்டு

கலைஞ்சு கெடக்குற வீட்ட கொஞ்சம் அடுக்குறதா

கண்ணுமூடுன பாட்டிக்கு அழுவறதான்னு நிக்க

செல்லாத்தா மகனுக்கு தகவல் வந்தப்போ

ஏழுமணி வியாபாரக் கூட்டம் பிதுங்குச்சு

கல்லா மாத்திவிடற கணக்குப்பிள்ளை லீவு

எப்படியும் கடைமூட இன்னொரு மணி ஆகும்

வெளியூருக்கு லைனுக்குப் போன பேரனுக்கு

எந்த போன்லயிருந்து கூப்பிட்டாலும் ஏனோ

தொடர்பு எல்லைக்கு வெளியவே இருக்கானாம்

எப்போ வருவானோ கொள்ளிக்குச் சொந்தக்காரன்

பங்காளி வீட்டுக்கும் ஊருக்கும் சொன்ன கையோட,

பக்கத்து வீடு, எதுத்த வீடுன்னு தட்டிச் சொல்லியும்

ஏனோ இன்னும் ஒருத்தரும் வந்து சேர்ந்தபாடில்ல

ஒருவேள ராத்திரி சோறு தின்னுட்டு வருவாங்களோ

அசையாம கிடந்த செல்லாத்தா மூஞ்சியில

அழைக்காமலே அலையலையா மொய்க்குது ’ஈ’

எல்லாம் சுளுவா கிடைக்கிற பட்டணத்துல

ஏனோ எழவுக்குத்தான் ஒரு சனத்தையும் காணல

___________________