வீடு

 

வேப்பமரத்தைத் தழுவி சாளரத்தில் சலசலக்கும் காற்று

கதகதப்பைக் கசியவிடும் சுவர் சில்லிடும் தரை

குதறும் குடும்பச் சண்டைகளை தின்று தீர்க்கும் கதவு

இடி மழை வெப்பம் குளிர் எதையும் செரிக்கும் கூரை

களைத்து வீடடைய தாயாய் தழுவும் தாழ்வாரம்

நேசித்துக் கொண்டாட ஒன்றா ரெண்டா ஒரு வீட்டில்

சமையலறை முகப்புச்சுவர் சாவி மாட்டுமிடம்

ஓய்வெடுக்கும் கொசுவை சுவரோடு ஓங்கியடித்த இரத்தக்கறை

காற்றில் தூரியாடும் மாத நாட்காட்டியின் அடிப்பக்க பிறை

சுவற்றில் கால் வைத்து ஓய்வெடுத்ததன் சாட்சியாய் குதிகால் சுவடு

நடக்கப் பழகிய பிள்ளை தாறுமாறாய்த் தீட்டிய கிறுக்கல்கள் என

கறைகள் படியா சுவர்கள் ஆன்மாவைத் தொலைத்தவை

உறங்கவும் புழங்கவும் புணரவுமான வெற்றுக்கூடா வீடு

பிறந்த மனிதர்களை அடைகாக்கும் கருவறைதானே வீடு





-0-