புத்தாண்டு கோக்குமாக்குகள்

குறுந்தகவல் மூலமே குடும்பம் நடத்தியவர்கள்கூட புத்தாண்டு அன்று குறுந்தகவலுக்கு காசு எனும் நிலைவந்தபோது”குட் மார்னிங்” கூட சொல்லிக்கொள்ளாதது. 

---

ஆண்டுமுழுதும் குறுந்தகவல் அனுப்பாதவர்கள் கூட, புத்தாண்டு அன்று மட்டும் தங்களுக்கு வந்த வாழ்த்துச் செய்தியில் பி(ப)டித்ததை மற்றவர்களுக்கு அனுப்புவதை சமூகக் கடமையாக நினைப்பது.


---


புத்தாண்டு சங்கல்பம் / உறுதிமொழி (Resolution) எதுவும் எடுப்பதில்லை என மார்தட்டும் நபர்கள் கூட மனதிற்குள் ரகசியமாய் ஓரிரு உறுதிமொழிகளை நினைத்துக்கொள்வது.
 
---

இலவசமாக கிடைக்கும் நாட்காட்டிகளின் எண்ணிக்கையை தனக்கான அந்தஸ்து என நினைப்பது.
 
---

எதுவுமே எழுதப் போவதில்லையென்றாலும், அன்பளிப்பாக கிடைக்கும் டைரிகளை வாங்கி வைத்துக்கொள்வது.


---


இலவசமாக கிடைக்கும் நாட்காட்டிகளின் தலைப்பகுதியில் மாட்டுவதற்கு எளிதாக ஒரு கயிறும் போட்டுக் கொடுத்திருந்தால் வசதி என நினைப்பது. 
 
---

புத்தாண்டு அன்று ஏற்படும் மகிழ்ச்சி, நிம்மதி ஆண்டு முழுதும் இருக்கும் என நினைத்துக்கொள்வது.

---
 
புத்தாண்டு ஞாயிறு அன்றே வந்தாலும், ஆண்டு முழுதும் ஞாயிறாக இருக்காது என்பதில் மட்டும் ரொம்பத் தெளிவாக இருப்பது.

---
 
மிகக் கவனமாக எழுதவதாக நினைத்தும் தேதிகளைக் எழுதும்பொழுது, பல நாட்களுக்கு முந்தைய ஆண்டின் வருடத்தையே குறிப்பிடுவது.
 
---

நாட்காட்டியை புதிதாக மாற்றும் தினமே எனினும் அதிகாலையில் எழுந்து, குளிரில் சிரமப்பட்டு குளித்து, கோவிலுக்குச் செல்வதை பக்தியின் உச்சமாக நினைப்பது.
 
---