கம்பி வேலி தாண்டுவதில்லை

சிலந்தி வலையை
விரல் கொண்டு கலைப்பது போல்
நம்பிக்கை அனைத்தையும்
விதி கலைத்துக்கொண்டு போய்விட்டது

எந்த மல்லிகை மணம் வீசும்..?
ச‌தை க‌ருகும் வாசனையை சுவாசித்த‌பின்

எந்த‌ குயில் பாடும்..?
கன்ன‌த்தில் கண்ணீர் கோடுகளோடு
கதறும் தாயின் குர‌லுக்குப் பின்

எந்த‌ உண‌வு ருசிக்கும்..?
இற‌ந்த‌ தாயின் மார்பில்
பால் தேடிய‌ குழ‌ந்தையை க‌ண்ட‌ பின்

இடிந்த கூரைகளை
எவர் வந்து வேயப்போகிறார்?

பிணம் மூடிய பள்ளங்களை
யார் வந்து தூர் வாரப்போகிறார்?

இழந்த கற்பை
எங்கே திரும்பப் பெறுவது?

கதறியழுதாலும்
கம்பி வேலி தாண்டுவதில்லை குரல்கள்