படிமங்கள்

நினைவுச் சின்னம்

அழகாய் வர்ணத்தில் நிரப்பினாலும்

ஆண்டுகள் பலநூறு நகர்ந்தாலும்

ஆயிரமாயிரம் பேர் படம் பிடித்தாலும்கூட

ஆழ்ந்து நுகரும் போது அடிக்கிறது

வீழ்த்திய தலைகளில்

வழிந்த இரத்தக்கவிச்சை

@@@@@@@

குச்சி ஐஸ்

குளிர்ச்சியில் மறத்த நாக்கில்

வருடும் சேமியாவோடு

கூசும் பல்லை இறுகக்கடித்து

குழையும் நாக்கை சுழற்றி

இன்சுவை வழியும் புறங்கையில்

தேடுகிறேன் கரைந்த என்னை

@@@@@@@

 

பரிணாமம்

வசிப்பிடத்தை பறித்து

பசியாற்றிய பழமரத்தை தகர்த்து

வாகாய் ஒரு கொட்டில் அமைத்து

டீ, வடை, போண்டா என வருவோர்

பசியாற்றி வயிறு வளர்த்தான்

பறிகொடுத்தவனை பிச்சைக்காரனாக்கி

_____________________________________